Антички музеј Хераклеја Линкестис

Со голема одговорност и максимално почитување на културното наследство, пристапивме кон проект за адаптација на источната просторија од театарската зграда во археолошкото наоѓалиште Хераклеа Линкестис. Оваа просторија располагаше со корисна површина од 100㎡, но нејзината висина од 9м ни овозможи формирање на галериски простор на три нивоа со кој корисната површина се зголеми на 210㎡. Изборот на галерии кои каскадно ќе се повлекуваат на секое наредно ниво, овозможи интегриран простор на музејски поставки видливи од секој агол.

Изведбата со лесна метална конструкција кај нивоата и кровот, направи чиста граница помеѓу новите интервенции и постоечкиот простор ограден во камен и тула. Големите застаклени површини кај отворите изведени во дрвени рамки, потоа употребата на дрво во ентериерот кај скалите, оградите од галериите, дел од подовите, како и витрините за експонати, понудија додатна топлина во просторот во кој доминираат природни градежни материјали.